Z Janšojc/Jänschwalde. Do Serbsko-nimskego domowniskego muzeja Janšojce jo muzejowa šefowka Rosi Tšukowa lětosa w jatšownem casu skóro wšednje pśepšosyła na mólowanje jatšownych jajkow z wóskowańskeju bosěrowańsku techniku. Wjele źiśecych kupkow z wokolnych šulow jo tam měła, mimo togo su byli na šesć kóńcach tyźenjow zmakanja za wóskowanje jajow. Wósebny termin jo se wótměł sobotu, 28. měrca, zeger 10:00 w ramiku nadregionalnego kóńca tyźenja k módrośišćoju. Do wuměłstwa wóskowańskeje bosěrowańskeje techniki jo Gerald Šejn zawjadł. Wobźělniki su byli wót BTU Chóśebuz-Zły Komorow, Łužyskego instituta za strategiske póraźowanje, Domowiny, su byli wuměłce ze Drježdźan, indigo-barwaŕka z Landshuta a dalšne z Eilenburga a Běłeje Wódy a se wě teke ze jsy.

Pśi kuždem źěłowem městnje su stojali gjarncyki z wóskom, kósyłka abo pisaki z glickami kaž teke głažki z pisanymi barwami. Z wjele šposom a frejdu jo se chopiło źěło a góźinku pózdźej su mógli se te późiwabne wuslědki wobźiwowaś.