Z Wjelikich Ždźar/Groß Särchen. Ulrich Schorcht (1947-2022), něgajšny pśedsedaŕ Domowniskego a kulturnego towaristwa Njebjelćicy z.t., jo na zachopjeńku 2000tych lět zagórjujucu myslicku zroźił. „Gaž comy region zmócniś, gaž comy wěcej znate wordowaś – pón my by dejali se na Krabata, dobrego serbskego guslowarja, dopomnjeś“, jo wón pógnuwał. Krotko pó tom jo z nim jěł tegdejšy njebjelćiski šołta Tomaš Čornak do Čornego Chołmca/Schwarzkollm. Zmakałej stej se z Gertrud Winzeroweju (1940-2024). Tamna dłujkolětna šołtowka a prědkstojaŕka jo kreatiwnje a njewomucnje wójowała za dožywjeński dwór Krabatowy młyn. „Skóńcnje něchten wěri do Krabata“, jo se wóna wjaseliła pódpěrje z Njebjelćic. Chylcycku pózdźej, dnja 19. měrca 2001, jo nastało w Čornem Chołmcu Towaristwo Krabat z.t.. 17 jadnotliwych wósobow, čornochołmcańske towaristwo „Brauchtumsgruppe Krabat e.V.“ a kulturny zawod „Lessingstadt Kamenz“ su byli jogo załožeńske cłonki.