Z Běłeje Góry/Byhleguhre. Jo był wjacor, kótaryž by se zasłužył wěcej zajma: slědnu srjodu w měrcu su pśiwitali organizatory rěda zarědowanjow „kultura na jsy“ wudawaŕku knigłow Marku Maćijowu. Njeglědajucy na słabu a wobtužujucu rezonancu publikuma jo se cytanje wuwiło k intensiwnemu a wósobinskemu dialogoju wó nastaśu togo rěda „Serbska biblioteka“.

Gaž awtorka/wudawaŕka ekstra z Budyšyna pśijěźo, aby nejnowše knigły pśedstajiła, maju organizatory wjeliku naźeju, až pśiźo wjele zajmowanych luźi. Ale tenraz jo wóstało wjele stołow proznych – jano mała gjarstka na literaturje zajmowanych jo drogu do „Starego konsuma“ w Běłej Górje namakała. Te ale, kótarež su pśišli, su dožywili atmosferu, kótaraž howac we wjelikich rumnosćach móžno njejo: bliska, awtentiska a wjelgin wobogaśujuca.