Z Města/Cottbus. Wót srjody slědny tyźeń jo naměsto slězy słyńcnego zegera ze kšasneju jatšowneju pychu wugótowane. Wěcej ako 60 źiśi chóśebuskego horta „Pünktchen und Anton“ jo tam wěcej ako 100 indiwiduelnje wupyšnjonych jatšownych jajow do krickow powjesało, mjazy nimi tek to jadno abo druge ze serbskimi motiwami. Pódpěrałej stej jich wušy šołta Tobias Schick kaž teke šołtowka Doreen Mohauptowa.

Taku akciju jatšownych jajow we nutśikownem měsće jo 2023 iniciěrował Citymanangement Chóśebuz, łoni jo ju teke pśewóźił projekt „Walorizacija serbskego kulturnego derbstwa we Łužycy“ (krotko IKE-projekt), kótaryž koordiněrujo Dompro gGmbH – a lětosa jo IKE-projekt tu akciju pśewzeł.

Prědny raz su źiśownje, horty a dalšne institucije (źiśi a starše luźe) ze wšyknych wokrejsow serbskego sedleńskego ruma w Dolnej Łužycy pśi tej akciji pódla byli a jaja mólowali. Něźi 8.000 jajow jo IKE-projekt jim rozpósłało, k tomu teke informaciski material a pśedłogi ze serbskimi motiwami a jich wuznamami.