Wěcej razow wob lěto jo Juliana Kaulfürstowa (2. wótlěwa), pódpěrowana wót dr. Hynca Rychtaŕja (lěwy), na wandrowanje pśepšosyła. 
Ze Slěpego/Schleife. 16 lět jo se Juliana Kaulfürstowa za serbsku rěc, kulturu a woplěwanje tradicijow w Slěpjańskej wósaźe angažěrowała. Wjelgin lažytej jej na wutšobje pśedewšym Njepilic dwór w Rownem a Šusteroc dwór w Trjebinje. Wóna jo lěta dłujko žywjeńske dopomnjeśa nosaŕkow serbskeje drastwy a maminorěcnych kradosćiwje zapisała. Cesnoamtski se wóna angažěrujo w towaristwje Njepilic dwór z.t. w Rownem a w towaristwje Kólesko z.t. Slěpe. Wó wažnych mrocnikach jeje statkowanja, jeje facitu a pśichoźe jo Andreas Kirschke powědał ze 46lětneju slawistku.
Kněni Kaulfürstowa, njedawno sćo pśepšosyli na Wašo slědne wandrowanje ako rěcna motiwatorka w Slěpem. Źo jo šło?
