Wuknice a wukniki z 12. lětnika DSG su se pśi wustupoma w źiwadle Piccolo z wjelikim pśiklaskom cesćili. Wósebna cesć jo tek płaśiła Marinje Eggertowej – angažěrowanej ceptaŕce za pśedmjat „pśedstajajuce graśe“, kótaraž na wuměńk źo. Z tym jo – bóžko – kóńc wucbnego pśedmjata „pśedstajajuce graśe“ na DSG. 
Z Města/Cottbus. Kak daloko smějoš we wucbje hyś? Kótare pedagogiske srědki smějo wuwucujucy zasajźowaś, bźez togo až wuknice a wukniki ako wósoby do tšacha spóraju? „Žwała/Die Welle“ jo młoźinski roman amerikańskego spisowaśela Mortona Rhuego (= Todd Strasser, *1950). Roman jo wujšeł 1981 a se póśěgujo napšawdu na pśewjeźony eksperiment „The Third Wave“. 1967 jo kśěł wucabnik na Wusokej šuli w měsće Palo Alto wuknjecym w swójom kursu stawiznow wujasnjowaś, kak jo mógał nacionalsocializm k organizěrowanemu masowemu gibanju wordowaś. Rhue jo nawězał na fakty togo wěrnego tšojenja a jo se z fikcijami kombiněrował. W graśu jo to angažěrowany wucabnik stawiznow Ben Ross, kótaryž co z pógibowanim z mjenim „Žwała“ swójim wuknjecym nazgónjenje zbližyś, wuwiśe w nacijowej Nimskej njepósrědnje dožywjaś. „Eksperiment“ pak wuwija w nejkrotšem casu swójsku dynamiku a pśiźo zwenka kontrole.
njeźela, 26.04.2026
