Z Pódstupima/Potsdam. Slědny tyźeń stwórtk jo se w bramborskem krajnem sejmje, ga we foyerje Ministaŕstwa za wědomnosć, slěźenje a kulturu, na 2. nastwaŕku, wótwóriła wustajeńca „In die Ruhe fallen“ z twóŕbami Helle Stoleccyc a Anny M. Kempe. Kužda zwuraznijo swóju perspektiwu na temy wokoło bliskosći, pśisłušnosći a změny. Hella Stoleccyc, dorostowa nosaŕka Bramborskego wuměłstwowego myta 2023, jo w serbskem swěśe wótrosła, ale „pokažo, až serbska kultura jo wjele wěcej ako muzealne konserwěrowanje abo folkloristiska dekoracija“, jo gronił Tobias Dünow, kulturny statny sekretaŕ a zagronity kraja za serbske nastupnosći, pśi wótwórjenju wustajeńce. „W zgromadnem statkowanju z akwarelami wót Anny M. Kempe, kótarež wulicuju wó cłowjeskich pótrjebnosćach mjazy distancu, wěstosću a njewěstosću, nastanjo zapśimujucy dialog.“