Z Města/Cottbus. W slědnem numerje Nowego Casnika jo se južo wó pósćenju tśich mytow Maćice/Maśice Serbskeje pisało. Myto „Bogumiła Šwjele“ se póśěgujo na wuknice a wuknikow Dolnoserbskego gymnaziuma (DSG), kenž su se ze serbskeju kulturu a/abo historiju we wobłuku wucby zaběrali a wó tom pisali, w nimskej abo serbskej rěcy. Lětosa jo se jadno źěło teke w pólskej rěcy zapódało, což jo snaź jano problem za pósuźowańsku komisiju był. Myto „Bogumiła Šwjele“ jo se wudobyła wuknica 12. lětnika Stella Kliemojc za jeje źěło „Die Wirtschaft der slawischen Siedlungen zwischen Elbe und Oder vom 6. bis zum 12. Jahrhundert“. Spěchowańske myto jo dostała Lucie Loichenojc ze samskego lětnika za jeje pśinosk „Statkowanje Miny Witkojc w a mjazy swětowyma wójnoma“, kenž jo dopołnje w dobrej dolnoserbšćinje pisała.