Z Budyšyna/Bautzen. „Staw serbskego pismojstwa jo indikator stawa cełego serbskego luda“, jo wótwóriła Lubina Malinkowa, se póśěgujucy na Jakuba Barta-Ćišinskego a Mikławša Andrickego, 18. měrca druge zarědowanje lětosnego rěda Serbska debata. Wóno jo se wótměło pód motom „Serbska literatura – pozicija a perspektiwa“ w zalu Serbskego doma w Budyšynje. Zgromadnje ze swójeju koleginu Terezu Jacobsoweju ze Serbskego instituta, kótaryž jo zarědowanje ako partnaŕ Sakskeje krajneje centrale za politiske kubłanje, Serbskich Nowin a Załožby za serbski lud sobu organizěrował, jo wóna moderěrowała podiumowu diskusiju, na kótaruž jo pśichwatało dogromady něźi 70 zajmcow – pśisamem połojca online –. Ako prědny jo dostał słowo jadnaŕ Ludowego nakładnistwa Domowina Syman Pětr Cyž, kótaremuž jo „zachowanje a dalejwuwiśe rěcy nadawk a wizija“ za nakładnistwo. Serbskorěcnu literaturu wudaś ma wón w tom zwisku za wažne, dokulaž „wustne pósrědnjenje rěcy njedosega“.