Z Města/Cottbus. Srjodu tyźeń jo wótźělenje za regionalne wuwiśe a mjeńšynowy šćit („Regmje“) pšosyło na rozgronowu rundu k filmowemu projektoju „Serbska utopija“. Dr. Lutz Laschewski, wjednik wót „Regmje“, jo wótwórił tu źěłaŕnicku, na kótarejž jo se wušej 20 luźi – mjazy nimi cłonki filmowego teama, wědomnostniki a dalšne zajmce – wobźěliło. SERBSKA UTOPIJA jo prědny rěd fikcionalnych wusćełanjow w dolnoserbskej rěcy, kótaryž serbske pśichodowe pśedstajenja a konfrontaciju tradicijow z modernym swětom pśedstajijo. Tśeśi źěl „Serbska utopija 3 – Nowaki“ jo swěśił 17. januara 2026 w połnem chóśebuskem kinje Weltspiegel wuspěšnu premjeru. „Za tym až prědnej źěla stej byłej ramikowe jadnanje, smy se wjelgin wjaselili, až smy mógli ze tśeśim źělom prědny gromadu wisecy serbski tv-film pśedstajiś“, jo gronił režiser Erik Šyško, kenž jo tu źěłaŕnju wjadł. Z jogo teama jo mjazy drugim teke głowna grajaŕka Wiebke Šelerowa-Šulcojc pśibytna była, kótaraž jo se z wósebnym pśiklaskom wuwitała.