Z Drjowka/Drebkau. Serbska tkajaŕska śpa jo njeźelu, 1. měrca, swóju lětosnu jatšownu wustajeńcu pód titlom „Zu Ostern neu entdecken – Ostereier aus der Sammlung von Traute Winkler“ wótwóriła.

Traute Winkler jo była wót 1965 do 1993 wjednica regionalnego muzeja w Dinslakenje. Na wuměńku jo wobstarała a saněrowała pachane twarjenje w Hesseńskej. W lěśe 1993 jo do starego burskego doma zaśěgnuła a jo kšac pó kšacu muzej jatšownych jajow natwariła. Jeje derbniki su jeje zběrku jatšownych jajow muzejoju Serbska tkajaŕska śpa pśepódali a tak jo mógła wjednica Doreen Hajašowa (Haiasch) w lětosnej jatšownej wustajeńcy wjele nowych jajow z cełego swěta prezentěrowaś. Mjazy nimi su kopije Fabergé-jajow, jaja zgótowane w technice Cloisonné, dalšne wuměłski wupyšnjone a rězane jaja z Azije a Afriki, wjelika zběrka porclinowych jajow wót Hutschenreutera a bogata licba jajow z pódzajtšneje Europy mimo žednych serbskich jatšownych jajow.