Wšojadno, lěc lodowaty wětš pó jsy šwicy abo zymny dešć do woblica placa. Zapust słuša mimo cwiblowanja k nejrědnjejšym tšojenjam we wejsnem žywjenju, źož wjelike a małe gromadu pśidu, se zapśimjeju a špos maju.

Nejpjerwjej: camprowanje a fašing

2026 su to byli te nejmłodše, kótarež su w Kśišowje zachopili ze swěśenim. Srjodu, 11. februara, su skokotali tšachotne zwěrjeta, skobodne super-ryśarje, błyšćate soniny a druge póstawy, pśewóźone wót wótkubłaŕkow źiśownje „Sonnenschein“ a někotarych starjejšych, pó jsy. Spiwajucy su do kuždych źuri klapali a se šćerkotanjeju w swójich zběrawkach wjaselili. 40-lětny jubilej ga swěśi ta kśišojska źiśownja lětosa. Ze pśechwatankami w bogatej licbje dej se ten jubilej swěśiś. Za toś te swětosnosći su źiśi pótakem něco „docamprowali“.