Z Budyšyna/Bautzen. Serbski ludowy ansambel jo był prědnego měrca srjejźišćo (górno)serbskeje rěcy a kubłanja. Rěčny centrum WITAJ (RCW) jo tam na swóju 15. schadowanku za familije, wósebnje pak na 25. jubilej swójogo wobstaśa pśepšosył. Pśi zachoźe jo witała wjednica RCW dr. Beata Brězanowa woglědarjow ze šlejfkami w serbskich barwach. Witko, mas-kotka projekta Witaj, jo se wósebnje tym małym gósćam pśiwobrośił. Beata Brězanowa jo se zjawnje źěkowała swójim sobuźěłaśerjam a sobuźěłaśeŕkam za jich spomóžne źěło. Swójo nagrono pak jo pśiwobrośiła šlejfce. „Šlejfka jo pyšnotka. W našej serbskej tradiciji ma wóna wósebne městno – pśi narodnej drastwje, pśi cylindru braški abo na wopušy kónja jatšownego rejtarja. Šlejfka pśerědnijo a pokazujo, až jo nam něco drogotne“, jo wóna groniła.