Ze Slěpego/Schleife. „UM/BRUCH – Transformaciska towarišnosć pódzajtšo 1989 - 1994“. To jo nadpismo rěda zarědowanjow, z kótarymiž wobswětlujo Towaristwo za wuslěźenje stawiznow demokratije rozdźělne śěžyšća pśechoda wokoło padnjenja Barlinskeje murje. Pó stacijach w městach Halle (Solawa), Riesa, Gießen a na kupje Hiddensee jo se w tom wobłuku dwójorěcny temowy źeń „Serbska kultura“ we Łužycy wótměł. Zachopk jo twóriła 25. februara podiumowa diskusija w Serbskem kulturnem centrumje Slěpe. Moderatorka Liane von Billerbeck jo wuwitała snadnu gjarstku zajmcow (nic razka źaseś) z tym, až jo se zagroniła w mjenju zarědowarja za pózdźe rozpósłane pśepšosenje, a jo pśedstajiła powědaŕki wjacora z pšosbu, krotko wopisaś, co serbstwo za nje wóznamjenijo resp. wucynijo. Filmaŕka Grit Lemkowa jo se zwažyła ako prědna na wótegrono „drje nejśěžčejšego pšašanja, dla kótaregož se mjazy sobu sami waźimy. Póchad grajo rowno tak rolu ako rěc a/abo woplěwanje nałogow. Chwalim sebje kazniski garantěrowane pšawo, se lichotnje k serbšćinje wuznawaś.