Z Łužyce/Lausitz. DBRegio ako za regionalne śěgi na wěstych linijach zagronite pśedewześe se južo wšake lěta procujo, serbsku rěc integrěrowaś do informacijow za drogujucych. Mjaztym jo juž lěta dłujko standard, na monitorach w śěgach pokazaś dwójorěcne mjenja dwórnišćow w serbskem sedleńskem rumje. Až jo hyšći njewótzamknjony proces móžomy rowno wiźeś w śěgach mjazy Chóśebuzom a Złym Komorowom. W staršych śěgach dajo hyšći software, kótaraž ma techniske śěžkosći ze wšakimi serbskimi pismikami, kótarež pón feluju. Nowša software z tym njama wěcej žedne problemy. Dla togo jo se zeleznica pak za to rozsuźiła njewužywaś aktualne městne zapiski serbskego sedleńskego ruma w Bramborskej ale widobnje jo ako žrědło wzeła stare zapiski wót NDRskeje Deutsche Reichsbahn (DR). Tak wiźimy teke Ruhland/Rólany a Lauchhammer/Łuchow dwójorěcnje. To jo DR w 1950tych lětach zawjadła a kóńc 1960tych lět zasej reducěrowała. Ruhland/Rólany jo pak zachopjeńk 2000tych lět južo raz slědk pśišeł, ako su dwójorěcne kursowe knigły z jězdnymi planami zasej krotkocasnje wózjawili.