Z Města/Cottbus. Pónjeźele, 23. februara, jo projekt SROKA do klubownje Dolnoserbskego internata na swóju prědnu źěłaŕnicku pšosył. A ned jo to šło wó wažnu, „jědrowu“ tematiku w zwisku z rewitalizaciju serbskeje rěcy, ga wó to, kak se (lěpjej) raźijo dalejdawanje serbskeje rěcy w familijach.

Pśepšosenjeju jo slědowało 15 luźi – tśi cłonki strategiskeje kupki SROKA, głownje wšak starjejše, ako maju nazgónjenja ze serbowanim w familiji abo kótarež maju žycenje, swójim źiśam serbsku rěc pósrědniś. Za te sobu pśinjasone źiśi jo se póbitowało wótwardowanje. Pśibytne su byli mimo togo teke projektowy team wokoło Měta Nowaka wót Serbskego instituta (SI), sobuźěłaśerje Rěcnego centruma WITAJ (RCW) a ako referentka dr. Anna Mróz.

Na zachopjeńku, w swójom krotkem pśedstajenju projekta SROKA, jo Sophie Rädelowa (SI, projektowy team) wó tom informěrowała, až we tom projekśe rowno běžy ta faza, w kótarejž se pśewjeźo wobźěleński proces (2025-2027). Južo wótzamknjona jo analyza wobstojnosćow (2023-2025), a což jo planowane za 2028-2031, to jo zwopšawdnjenje rěcneje strategije za dolnoserbšćinu.