Oldsum/Olersem. Februar jo w Pópołnocnej Friziskej cas zapalenjow Biikow. To su wjelike wognje a źěl imaterielnego kulturnego derbstwa Nimskeje – tak ako serbske nałogi teke. A kužde lěto pśed Biikow pśepšosyjo Pódpołnocna friziska rada na pśiwitanje. Jo to zarědowanje za politisku komunikaciju mjazy Pódpołnocnymi Frizami a šleswig-holštejnskeju politiku. Dnja 15. februara jo se wótměła pśiwitanje w Oldsumje/Olersemje na kupje Föhr/Feer. Wokoło 100 luźi jo pśišło. Mjazy nimi teke nosaŕki wšakorakich friziskich drastwow a teke Serby ako něgajšna pśedsedaŕka załožboweje rady Susan Šenkec, Jurij Wesela a wót Serbskego instituta w měsće Měto Nowak. Wósebnosć lětosnego zarědowanja jo pśibytnosć ministaŕskego prezidenta Šleswig-Holštejnskeje Daniela Günthera. Pśiwitanje jo stojało pód motom „Wěcej ako kupa“. Pśedsedaŕ Pódpołnocneje friziskeje rady Ingwer Nommensen jo w friziskej rěcu na to pokazał, až Frize, lěcrownož su mjeńšyna, su teke źěl cełkowneje towarišnosći. Nichten ga njoco nasypy wokoło Frizistwa stwóriś, aby nichten wótwenka njepśišeł.