Z Noweje Jsy/Neuendorf. To jo było hyšći kradu zymske wjedro, ako jo se sobotu, 21. februara, ten 129. serbski zapust w Nowej Jsy w gmejnje Gatojce wótměł. Dogromady 50 młodostnych a 18 źiśi jo se połdnjo zmakało w gósćeńcu „Kastanienhof“. Pśewóźili su jich te Strobicańske dujaŕske gerce, ako su zeger 13:30 wumaršěrowali. Za kupkowe foto jo se ekstra jawišćo pśed gósćeńcom natwariło.

Pśi pśeśěgu pó jsy su chóžyšćo sobu wzeli, kenž jo był z barwojtymi bantami – ga ze serbskimi barwami – wupyšnjone. Wóno jo se wě symbol za to, až dej se zyma wumjasć. A jo se zdało, až jo se to raźiło, pśeto w běgu wótpołdnja jo wjedro se bytšniło. Tam a zas su słyńcne tšny te změstymi hyšći pólodnjone puśe dojśpili a wobswěśili.

Wótpowědnje tudskej tradiciji jo zapustojski pśeśěg teke pśed pomnikom padnjonych dweju swětoweju wójnowu zastał. How jo se wěnc wótpołožył a jadnu minutu su na tych we wójnje wóstanjonych Nowsanarjow spomnjeli.

K wjacoroju su w gósćeńcu „Kastanienhof“ rejowali až do pśiducego dnja.