Z Města/Cottbus. Kulturny salon Chóśebuz („Kultursalon Cottbus“) jo towaristwo, kenž sebje prědk wzejo, nowe akcenty w chóśebuskej kulturnej scenje sajźiś a rumy zmakanja za a pśez kulturu stwóriś. „Tak comy za region kulturelny a towarišnostny pśinosk wugbaś“, zgónijomy na jich webboce (kultursaloncottbus.com). Mjaztym jo to stwórte lěto, w kótaremž Kulturny salon Chóśebuz lětny program k wěstej temje wugótujo. Wó tom programje – lětosa se wšykno wijo wokoło temy „wóda“ – wóni teke informěruju na swójich bokach (kultursaloncottbus.com/

wasser-2026/), źož jo mimo togo móžno, tikety kupiś. Ale teke pśi oficielnem wótwórjeńskem zarědowanju su cłonki Kulturnego salona Chóśebuz swój zdźěla kradu eksperimentelny kulturny program 2026 pśedstajili, a k tomu su pšosyli njeźelu, 15. februara, do Wuměłstwoweje hale Łužyca. Ekstra za tu góźbu su se tam powjesali twóŕby Patricka Rosenblatta z wódnymi motiwami. Wokoło 70 luźi jo pśepšosenju slědowało.