Z Města/Cottbus. We łońskem měrcu jo Serbski ludowy ansambel (SLA) prědny raz pokazał balet „Smy! – Bin ich?“ w Piccolo Źiwadle Chóśebuz. Lětosa, ga 14. měrca, ta wuspěšna inscenacija tam změjo come-back.

Rejowański kus „Smy! – Bin ich?“ jo rownocasnje myslowe graśe, kótarež slěźi za identitu. Gromaźe z rejowaŕkami a rejowarjami SLA se pśiwobrośijo ta w Lipsku bydleca, wšak z Dolneje Łužyce póchadajuca choreografowka Gundula Peuthertowa tomu pšašanjeju, co to wóznamjenijo, serbska/serbski byś. Luźe z regiona su se k serbskim temam napšašali a jich stojnišća su se do choreografiskego rozestajanja zaplatli – rowno tak teke perspektiwy rejowaŕkow a rejowarjow na swójski kradu rozdźělny narod, na jich póchad.