Z Raduša/Raddusch. To tradicionelne wugnaśe zymy se teke wót wobydlarjow Błotow njewomucnje woplěwa, a to cesto ze pśiběrajucym wobźělenim – tak ako slědny kóńc tyźenja w Radušu. Młogi z teje jsy póchadajucy jo za to ekstra wótdaloka pśichwatał. Južo familijoweje tradicije dla jaden njesmějo skomuźiś ten wósebny tradiciski swěźeń!

A to zawěsće se njestanjo tak cesto w stawiznach wugnaśa zymy: Radušańske camprowarje su hyšći pśi sněgu a loźe startowali, aby k wjacoru se do „pśednalěta“ dostali. Pśiducy źeń (njeźelu) su zapustarje musali z kopicu dešća žywe byś. Ale to su pśiwzeli z wjele humorom, hynac njeby to šło!