Z Lěd/Lehde. Wjeliku rozpłošonosć mjazy Lěźanarjami njenadejźoš, gaž we rozgronje z nimi na temu zyma pśiźoš. Anja a Sebastian Kilka stej wobgóspodarjowarja (Betreiber) wót „Mutschenhof“ a stej na pśisamem wšykne wjedrowe poměry nastajonej. Stej ga žywej wesrjejź natury. Tuchylu jo to za njeju źe z wěcej źěłom zwězane, swóje zwěrjeta zastaraś. „Musym wótere raze wob źeń tu źěru w loźe tšugi, ten „plawnik“, ako my how gronimy, lichy źaržaś. Aby dostali zwěrjeta fryšnu – gaž tek lodzymnu – wódu. Napowa (Tränke), źož mógu se gowjeda sami z wódu wobsłužowaś, ta pśi mrozu se wě njefunkcioněrujo. Toś musymej ze žeńskeju samej ze zbórkom a kanu něco librowaś“, wulicujo Sebastian Kilka. Wacej wogrějo tłusta warstwa słomy te zwěrjeta w groźi. Druge domacne zwěrjeta su se tejerownosći z temperaturami aranžěrowali: Kócki pśidu lěbda hyšći wen z topjaŕnje (Heizungsraum), a paw Rex wěcej njespušćijo swójo městno cele górjejce na zběrańskem kótle (Speicherkessel). Kilkojc jomu samo futer dogórjejka dajotej.