Z Bórkow/Burg. Dnja 27. januara 2026 jo se w awli zakładneje a wušeje šule „Mina Witkojc“ Bórkowy wótměło swětocne pósćenje mytow za 18. pisańske wuběźowanje „Źiśi pišu za źiśi“. Wuběźowanje jo nastało pśed 18 lětami z ideje błośańskeje wulicowaŕki a awtorki Marleny Jedroweje zgromadnje z Ines Bunzeloweju, kótaraž jo wobsejźaŕka knigłownje „Cytańske znamje“ („Lesezeichen“) w Bórkowach. Za něnto mytowane łońske wuběźowanje jo jury z pěś wósobow – Marlena Jedrowa, Ines Bunzelowa, Anke Fellenbergowa, Marion Hirchowa a Tiffany Šultchenojc – dostała cełkownje 44 literarnych twóŕbow wót źiśi. Rozsuźenje, kótare teksty se do publikacije pśiwzeju, njejo jury lažko wót ruki šło. Kužde literarne tšojeńko jo se wót wšyknych cłonkow jury rozglědniwje cytało a pó kriterijach ako starstwo awtorkow a awtorow, wuměłska ideja a pšawopis gódnośiło. Mimo togo dejali se wuzwólone wulicowańka góźeś a pósrědniś serbskim medijam ako Nowy Casnik, Płomje abo Pratyju.