Z Blunja/ Bluno. Z wejsneju cerkwju w Blunju zwězujo Udo Cipak (Zippack) mócnu kokulu we wěrje. We tom 1673 natwarjonem pachanem bóžem domje wón zacuwa te dłujke stawizny, solidne rucnikaŕske wuměłstwo a spócetnosć – a pśiźo do rozmyslowanja wó tych małych, bytostnych wěcach w žywjenju. „How som se dupił a górjej brał. Teke mójej góleśi Sarah (18) a Johannes (14) stej se how dupiłej a górjej brałej“, wulicujo ten 51-lětny Blunjanaŕ. 2009 do 2024 jo se wón cesnoamtski ako prědkstojaŕ jsy angažěrował. Źinsa wón pśiwobrośujo swóju móc a iniciatiwu ewangelskej wósaźe Bluń, dobrowólnej wognjowej woborje Bluń a serbskemu domowniskemu a drastwinemu towaristwoju Bluń. „Derbstwo prědownikow wobchowaś a woplěwaś, to jo mě wažne“, měni ten blidaŕski mejstaŕ a „blunjańska prakamizna“.