Ze Žylowa/Sielow. „Na póli su pastyrje“ jo ewangelska wósada w Žylowje połna nutśnosći zgłosyła. Prědnu njeźelu w nowem lěśe su ga swěśili w tamnej wejsnej cerkwi nimsko-serbsku namšu. Pśi tom jo cytał student Elias Bisse (24) někotare zapšosby w dolnoserbskej rěcy. „Ansambel ,Resonantia‘ z Lipska jo tam rozwjaselił z nimskimi spiwami a teke z dwěma dolnoserbskima spiwoma“, wulicujo Elias Bisse, kenž studěrujo w pětem semesterje na Bramborskej techniskej uniwersiśe Chóśebuz-Zły Komorow management wobswěta a resursow. Wót ranego źiśetstwa wón se cujo z dolnoserbskeju rěcu zwězany.