Ewangelska cerkwja w Nimskej (EKD) jo se wjele prědk wzeła. W směrnicach za nowe spiwaŕske knigły, kótarež južo stoje zajmowanym wósadam za wuproběrowanje wót nazymy 2025 k dispoziciji, jo zapisane: „Rěc kjarližow dej byś sensibelna za rody a mjeńšyny.“ To jo wažne wuznaśe w casach, w kótarychž se dejało źiwaś na wjelerakosć a inkluziju. Weto grozy EKD na swójskich wupominanjach pśi praktiskem pśesajźenju se rozbijaś.

Njeglědajucy na napominanja Serbow, wót Mjeńšynoweje rady Nimskeje a z pótrjefjonych krajnych cerkwjow njejo doněnta daniž jadnučki spiw w serbskej rěcy, frizišćinje, dańšćinje abo romanes za nowe zakładne wudaśe (Stammteil) spiwaŕskich pśedwiźony. Gaž powěda EKD wó „mjeńšynowej sensibelnosći“, měni wóna zazdaśim jano wěstu družynu mjeńšynow – nic pak wóne styri w Nimskej oficielnje pśipóznate narodnosći, kótarychž rěcy stoje pód šćitom Europejskeje charty regionalnych a mjeńšynowych rěcow, kótaruž Nimska jo ratificěrowała w lěśe 1999.