Ze Serbskego domu/Wendisches Haus. Chtož co wiźeś, kak rědna jo serbska drastwa w Janšojcach, ten dej se woglědaś nowu wustajeńcu w Serbskem domje, kótaraž jo se slědny tyźeń stwórtk wótwóriła. Jej se groni „Serbska drastwa w regionje Sprjewja-Nysa/ Wendische Trachten der Region“. Tak ako pśecej jo teke tenraz Serbska kulturna informacija Lodka w Serbskem domje toś tu wustajeńcu insceněrowała.

Tenraz su to fotografije, kótarež su cłonki fotowego kluba w Picnju, ako bu w lěśe 2006 załožony, wótmólowali. Wón ma tuchylu jadnab źaseś cłonkow, kótarež su doma w Picnju, Chóśebuzu a w Gatojcach/Teichland. Pśi swójom źěle z kameru jo za nich to serbske w picańskem amśe wósebny motiw, což se teke pokažo we tej nowej wustajeńcy w Serbskem domje. Tenraz su se za to wupytali serbske drastwy w Janšojcach. Gromaźe z tamnym wejsnym muzejom běchu tam wugótowali zmakanje ze žeńskimi a źowćami z Janšojc – wšykne we wšakich serbskich drastwach –, aby je wótmólowali. Něźi styri góźiny su za to trjebali, aby w muzeju samem a wokoło njogo namakali pšawe a rědne motiwy za te fotografije.