Z Janšojc/Jänschwalde. Stwórtk tyźeń jo se we brunicowej jamje Janšojce wuspěšnje rozbuchnuł wuwózny móst (Förderbrücke) F60, kótaryž jo wušej 45 lět we tej jamje „we słužbje“ był. Tomu móstoju F60 jo se teke gronił „lažecy Eiffelowy torm“ – a pla njogo jo se ga jadnało wó nejwětšu pógibliwu źěłowu mašinu swěta. Wót takego wuwóznego mósta – 502 mejtarjow jo F60 był dłujki, 204 mejtarjow šyroki, 80 mejtarjow wusoki – dajo pó cełem swěśe jano pěś eksemplarow, a w janšojskej jamje jo se to stało prědny raz docełego, až taki móst jo se rozbuchnuł. Zagronity rozbuchowy mejstaŕ Michael Schneider jo wuzwignuł, až jo to „cele wósebne“ tšojenje było.

Něźi 3,5 miliardow kubiknych mejtarjow zemje jo móst F60 wuwózył a wobgóspodarjowaŕ wugloweje jamy a milinaŕnje LEAG pó-dajo, až jo kužde lěto něźi 14 milionow tonow brunice wótekšył.

Wobswětowa seś Zelena liga a wobydlarje tych něga wót janšojskeje jamy wobgrozonych jsow su byli wólažcone, až jo se ten wjelicki wuwózny móst rozbuchnuł.