Ze Smogorjowa/Schmogrow. W surowej zymje a weto pśerědnje su se pokazali Błota na prědnem kóńcu tyźenja we februarje, kenž jo tradicionelny zapustowy kóńc tyźenja w Smogorjowje. Pśisamem wšykno ze sněgom pókšyte a stopnje daloko pód dypkom zamarznjenja – to njejo mógało młoźinu Smogorjowa wót togo wótźaržaś, ten stary serbski nałog zapusta w swójej rodnej jsy zasej ze žywjenim połniś. Głosna muzika a pyšne barwy deje zymu wugóniś a śopły lětny cas póstrowiś. Pśi tom jo smogorjojski zapust wopšawdu južo kradu stary.

To dajo se dopokazaś, až jo se ten nałog how južo pśed 151 lětami swěśił. Na to tek dopomina lětna licba 1875, kótaraž jo wušywana na slěznem boce klambawy, wósebnego znamjenja smogorjojskego zapusta. To jo wósebny kus, kótarež smogorjojske młodostne wótdawna woplěwaju a wobchowaju. Nejskerjej jo zapust w Smogorjowje hyšći staršy. Ze wušej 600-lětnych stawiznow sprjewineje jsy móžo se to nanejmjenjej gódaś. Toś ten jubilej – 625 lět Smogorjow – dej se z jubilejnym lětom 2026 wótpowědnje wóswěśiś. Młoźinski zapust jo k tomu twórił witany a raźony zachopk.