Z Města/Cottbus. Wobźělnice a wobźělniki tśeśego lětnika w programje Zorja se w rěcnem gnězdźe w Dešnje intensiwnje zanuriju do serbskeje rěcy. Aby se wóni teke raz do serbskego pówołańskego swěta zanurili, deje w měrcu togo lěta praktikum absolwěrowaś. Młoge hyšći pytaju se góźece městno a togodla stej rěcnej trenarja Pětš Ciążyński a Karlinka Köhlerojc ze swójimi Zorjakami slědny tyźeń srjodu do klubownje Dolnoserbskego internata woglědałej. W ramiku rotěrujucego „speed-datinga“ su tam mógali zastupnice a zastupniki serbskich institucijow jim swójo źěło pśedstajiś, pšašanja wótegroniś a wó praktikanta abo praktikantku wabiś. Zastupjone su byli Domowina, Dolnoserbska kulturna akademija, Rěcny centrum WITAJ, Serbski muzej Chóśebuz, Załožba za serbski lud/Lodka, Dolnoserbska biblioteka, Šula za dolnoserbsku rěc a kulturu, chóśebuska zagronita za serbske nastupnosći a teke redaktorka Nowego Casnika.