Z Pódstupima/Potsdam. Pónjeźele, 6. januara, jo dojšeł do Bramborskego krajnego sejma list z wuchytowanjami (Beschimpfungen) a grozenim z mordaŕstwom póstajony na zagronitego za wójowanje pśeśiwo antisemitizmoju w kraju Bramborska Andreas Büttner (Linke). Źeń pózdźej, 7. januara, jo zastojnstwo krajnego sejma to zdźěliło. Wótpósłaŕ lista njejo znaty, we njom jo wšak był wiźeś symbol islamistiskeje organizacije Hamas. List jo wopśimjeł pismo, kenž jo Andreasoju Büttneroju z mordaŕstwom grozył, mimo togo běły pulbjeŕ. Policija jo se naměsće informěrowała, běła substanca jo se pśespytowała a su ju měli za njepógroznu.

Policija slěźi za wótpósłarjom, za motiwaciju a cilom teje pósłanki. Nicht njejo se zranił. Andreas Büttner jo wuzwignuł, až njedajo se wutešniś, až wjeźo swójo źěło cele normalnje dalej.