Z Budyšyna/Bautzen. „Serbski institut (SI) se pśecej hyšći cesto wiźi ako póměrnje mały slěźeński institut. Glědajucy na tych něźi 70 wědomnostnych projektow, kótarež až k 80 sobuźěłaśeŕkow a sobuźěłaśerjow lěto za lětom wobźěłajo, toś ten wobraz dawno wěcej njewótpowědujo faktam.“ Z tymi słowami jo wótwórił direktor prof. dr. Hauke Bartels 18. decembra 2025 casnikaŕske rozgrono, w kótaremž jo medijowym zastupnikam bilancu ku kóńcoju 2025 kaž teke wuglědy na to pśiduce, ga to 75. jubilejne lěto instituta pśedstajił. Naspomnjeta licba projektow wobpśimjejo mimo slěźenja w tradicionelnych jědrowych wobłukach SI – to groni mimo rěcnych a stawizniskich wědomnosćow – teke wobłuki togo mjaztym samostatnego wótźělenja za regionalne wuwiśe a mjeńšynowy šćit, wobłuki (pśirownujucych) kulturnych wědomnosćow kaž teke bogatu licbu interdisciplinarnych kooperacijow.