Z Města/Cottbus. Kak jo z małego pampuga jaden wjeliki wordował – wó tom wulicujo muzikaliska rejowańska bajka „Mały pampug“, kótaruž jo Serbski ludowy ansambel sobotu, 13. decembra, we wupśedanem zalu Komornego źiwadła w Chóśebuzu prezentěrował. Publikum – mjazy drugim teke źiśi ze serbskich familijow a z Witaj-źiśownjow – jo se wuwjadł do wukludneje kuchnje, w kótarejž rejujucy team kucharjow pjaco pampug. Teke kócka bydli we tej kuchni a jo jadnučka figura, kótaraž teke powěda a spiwa. Južo zachopjeńk z rejami a luštnymi scenami jo źiśi ned wobmanił – wšykne su śiche byli, su až do kóńca ze zajmom wšomu slědowali.