Prědne styri mjasece su mimo. Wence to bywa zymnjej a w rěcnem gnězdźe w Dešnje wěcej gněśate. Ale nic, gaž jo Gregor Wie-czorek ako docent na rěźe. Tak su se wšykne kóńc oktobra hyšći raz pórali do góle pla Hochoze. Hochozaŕka Irena Halbašowa jo teke tśeśemu lětnikoju pokazała, źo se namakaju te zeleńki a kak te se pśigótuju. Tyźeń pózdźej jo pśišła Lizka Wimmerowa z drugego lětnika na woglěd. Wóna jo Zorjakam pokazała, kak se šyjo serbska bluza abo serbski bruslac. A jadna pšawidłowna woglědaŕka w slědnych styri mjasecach jo definitiwnje była Astrid Šramina wót Dolnoserbskeje kulurneje akademije. Naglědniwje jo wóna prezentěrowała serbske nałogi w běgu lěta. Za kuždy nałog jo wóna sobu pśinjasła jaden abo dwa pśedmjata, ako stej k tomu nałogoju pasowałej. Kłobyk k zapustoju abo serbske spiwaŕske za jatšowne spiwaŕki.

Wuknuś, pśespytowanja pśetraś a swěśiś

Ale teke prědne rěcne pśespytowanje jo musało se wótměś. Tak su wšykne Zorjaki w rěcnem centrumje WITAJ we wšakorakich niwowach (A1, A2, B1, B2) pśespytowanje za swój prědny rěcny certifikat złožyli. Wobstali su wšykne.