Z Bórkow/Burg. Slědnu sobotu su byli Bórkowy ceło zatkane! Nic ceła wjas, ale wósebnje wšake źěle a drogi na Prizach a w Kupaŕskich Bórkowach. Tam jo se mjerwiło z luźimi a awtami. Co jo se stało? Pó dobrej tradiciji ga jo gmejna Bórkowy teke lětosa zasej pśepšosyła krotko pśed gódami na wjelgin woblubowane zarědowanje „Adwent na dwórach“. A dokulaž take wjelgin stare a historiske dwóry a žywnosći za wětšy źěl na kšomach jsy stoje, jo był tam, to se wě, ten nawal narskich gósći zbliska a zdaloka wósebnje mócny.