15. stacija: Nowa Niwa/Neu Zauche

Docełego prědny raz běšo Błośańska zeleznica 29. maja lěta 1898 – to jo było prědny swětkowny swěźeń – jěła z Tšupca do Lubina. Kradu 20,4 kilomejtari dłujka jo była ta cera, a za to jo „Gusta“ trjebała pśisamem cełu góźinu!

Jadna serbska žeńska, ako jo pśisamem kuždy źeń na tej liniji jězdźiła z Tšupca do Lubina, jo była Marga Morgensternowa z Lubina. „Ja som była sedym lět dłujko ducy z teju bonu mjazy Lubinom a Tšupcom. W zymskem casu, gaž jo było zajtšo a wjacor južo śmojte, smy sejźeli kołowokoło małych kachlowych kamjenjow a smy gromaźe spiwali“ – tak móžomy to cytaś w knigłach „Spreewaldbahnen“ wót Petera Beckera.

Prědna stacija na tej liniji jo było dwórnišćo w Nowej Niwje, něźi tśi kilomejtarje wót Tšupca. Wóttam jo jězdźiła blisko znatego tšupcańskego młyna, pón pśez šoseju do Lubina a dalej mimo bliskeje „Winice“ do Noweje Niwy.