Z Hajnka/Hänchen. Ku swójomu slědnemu pósejźenju w toś tom lěśe su byli cłonki Serbskego wuběrka we wokrejsu Sprjewja-Nysa (SPN) zajźonu srjodu do Cełkowneje šule Sprjewja-Nysa w Gołkojcach pšosone. Šulski wjednik René Schulz jo rozpšawił wó serbskich aktiwitach we šuli.

Chwalił jo dobre zgromadne źěło z kooperaciskimi partnarjami, mjazy drugim z Dolnoserbskeju kulturneju akademiju a Domowniskim muzejom Dešno. Wóni zmóžniju pósrědnjenje serbskeje kultury w ramiku źěłoweje kupki (AG) a projektowych tyźenjow. Tak ako wšuźi feluju ceptarje za serbsku rěc. René Schulz by rad serbsku wucbu póbitował, dokulaž wobstoj teke zajm wót boka wuknjecych. Wobrośił jo se dla pódpěry južo na wšake serbske institucije, ale te njamaju kapacity. Na pósejźenju Serbskego wuběrka jo napominał kuždego, kenž wumějo dolnoserbsku rěc, se pla njogo pśizjawiś.