Z Města/Cottbus. W měrcu 2024 jo Petra Richterojc prědne myto za swójo tšojeńko „Danka & Janka“ w ramiku literarnego wuběźowanja Domowinskeje župy Dolna Łužyca dobyła. Tegdy jo jury ju wuchwaliła za „ideju a wuwiśe literarnych figurow“ kaž teke za „rěc a sadotwaŕ, kótarejž stej za dobre cytanje wjelgin gódnej“. Zajźony pětk jo swóje pśed krotkim w Ludowem nakładnistwje Domowina wujźone dwójorěcne źiśece knigły w Serbskem domje pśedstajiła a jo se wóspjet wjeliku chwalbu jadnab 25 pśibytnych zasłužyła. Danka a Janka stej nejmłodšej źowćce nykusa a „zelenej kaž młodna tšawka w nalěśu“. Ze swójim nanom, kenž jo „blědy a wjeliki ako luź“ wudajotej se źowći na mark, źož jězdźitej z karaselom a pótom, ak to se słuša pśi takem wulěśe, cotej „nanejžwětšeju waflu na swěśe z nanejžwětšu kopicu loda“ jěsć. W rěźe pśed wafloweju budu pak trjefijotej wjelikego, tłustego muskego, kenž dla njedorozměśa šćoka na „tu zelenu njedrowu chasu“. Ako jeju nan co togo muskego ako stražnik za nykusowy jazor pśistajiś, se źiwatej Danka a Janka.