Schadowanka zasej w nowem formaśe, slědne lěto dkw a lětosa Gladhouse. Załožba jo najmjeła ned ceły dom, a tak smy měli wjele městna – jano te luźe su felowali, aby to cełe městno połnili. To jo było škóda, dokulaž som se južo wjaseliła na zmakanje z lubymi znatymi a na zajmne rozgrona. To pak bóžko njejo było tak, což woblutujom. Cogodla Serby njepśidu na našu Schadowanku? Ale jaden cesny gósć jo weto był, direktor Załožby Jan Budar z manźelskeju, za to chwalbu!! Organizatory su se wjeliku procu dali z programom, wó tom jo se južo pisało we slědnem Casniku. Wjelicne jo było ned wuwitanje w Gladhousu, na cełej fasaźe su wiźeś byli rědne serbske wobraze we pisanej instalaciji. Nutśi su se wótměli na wšakich dypkach rozdźělne wěcy, filmy, rozgrona, KI-wobraze, spiwanje, rucne zaběry abo wuknikojska firma DSG. Woglědaŕ pak jo był pitśku zgubjony we tom cełem. Lěpjej by było, pśi zachoźe wjeliku toflu nastajiś z konkretnymi casami, ga se co źo wótmějo. Luźe njejsu to namakali, což jo se we flyeru pśipowěźeło.