Zapšawym jo było wšo tak derje pśemyslone a planowane: Ako město su Gladhouse wuzwólili. Chor Serbskego gymnaziuma jo wustupił a teke młoge druge aktery ze serbskego swěta su swóju źělbu k programoju pśidali. Wóno jo dało někotare atrakcije ako selfij-staciju abo tu móžnosć, wirtuelnje se pśeměniś daś do serbskich bajkowych figurow. Ako wjerašk wjacora su najmjeli live-band Total, wobstojecu ze źaseśoch gercow a spiwarjow. Samo zwenka teje wjaže jo se něco tšojło; su ga z projektorom to pismo „Schadowanka 2025 Chóśebuz“ a wšake serbske motiwy na fasadu chytali, aby interesenty pśiwabili. Pomogło pak njejo nic, pśeto jano kopicka luźi jo ten wjacor tu drogu do Gladhousa namakała. Ten flak prědku jawišća jo wóstał prozny a publikum za muzikarje pśisamem njewidobny. Hyšći mjenjej widobne su byli wukniki gymnaziuma; wóni su zazdaśim docysta felowali (njejo-li, až su wordowali tam we ramiku programa wótpósłane). Zwětšego su se tam rozluštowali pśistajone serbskich institucijow (ako ja).