Z Picnja/Peitz. Pó cełej Nimskej jo 21. nowember „źeń pśedcytanja“. Ale teke wokoło togo dnja dajo wjele akcijow, a wósebnje do źiśownjow a šulow pśidu ku tej góźbje angažěrowane luźe, aby źiśam něco pśedcytali a je za tšojeńka abo basni zagórili. Tak jo se pódała serbska spisowaśelka a basnikaŕka Źilka wałtoru, 18. nowembra 2025, do Mozaikoweje zakładneje šule Picnjo, źož jo woglědała k serbšćinaŕkam a serbšćinarjam 4. lětnika. Za tamne cytanje jo se wóna tematiski koncentrěrowała na „nazymu“. Z toś teju temu su se te wuknice a wukniki ceptaŕki Stephanie Heinzoweje w slědnem casu intensiwnje zaběrali, ga teke dla nazymskeje olympiady na Dolnoserbskem gymnaziumje, na kótarejž su se 8. nowembra wobźělili. Źilka jo była pśechwatana, kak wjele serbskich nazymskich słowow jo pśibytnych źaseś źiśi jej mógło groniś! Wóna jo jim swóje tśi źiśece knigły pokazała a z nich cytała mjazy drugim k nazymje perfektnje se góźece tšojeńko „Banjawa a rjascheny“, baseń „Ronja guslujo“ (pśeto teke chódoty se šykuju do nazymskeje atmosfery) a tšojeńko „Jašćericka a škrodawa“, źož se jawi mjazy drugim žywa wěcha.