Z Města/Cottbus. Dnja 18. nowembra 2025 jo Rěcny centrum WITAJ (RCW) Chóśebuz pśepšosył na Serbski familijowy źeń do Žylojskeje drogi 39. How su sobuźěłaśeŕki a sobuźěłaśerje pisany program za gósći pśigótowali. Su pśišli serbske familije, wobydlarje Dolnoserbskego internata a hort wětošojskeje zakładneje šule. Na zachopjeńku su pokazali dolnoserbski źiśecy film „Pomoc za nykusa“, kótaryž jo w lěśe 2007 ze serbšćinarjami zakładneje šule Tšupc a z jich ceptarjom Uwe Gutšmidtom nastał. Pó filmje jo wjednik Rěcnego centruma WITAJ Chóśebuz Bernd Melcher z projektoweju wobźěłaŕku Katrin Lehmannojc gósći pśiwitał a zgromadnje su spiwali „Wjasele źinsa“. Źiśi a starjejše su mógali pótom wjele rědnych wěcow dožywiś: Pód zemju, pótakem w piwnicy, jo lutkowa źěłaŕnja była, źož su mógali basliś domcyk za lutka. Pitśku dalej jo grajna budka była. How su pśewjadli luštne pógibowańske graśa. W rumach RCW jo za wuměłcowki a wuměłcow „mólowański raj“ natwarjony był a za „mudre liški“ jo dało serbski kwis. W klubowni internata jo był muzikowy rožk.