Ze Žylowa/Sielow. Domowinskej kupce Chóśebuz a Žylow woplěwatej južo dłujko zgromadnu wěc: Wónej zmakajotej se kužde lěto w nowembrje na zgromadnu Serbsku kjarmušu. Za to matej teke gósćeńc, ako se k tomu wjelgin derje góźi – ga kafejownju „Nordstern“ w Žylowje.

Teke lětosa su cłonki wobeju kupkowu swěśiłej swóju woblubowanu zgromadnu kjarmušu, a to jo było slědnu sobotu. Jadnab 40 kjarmušaŕkow a kjarmušarjow jo pśichwatało a wšykne su byli wjelgin narske, kaka kulturna kupka buźo jich ten wjacor rozwjaseliś. To jo było napšawdu wjelike pśechwatanje! „Błośańske gitary/Spreewaldgitarren“ su grali a k tomu spiwali. To zajmne pśi tom jo, až běšo toś ta kupka rowno pśed tyźenjom na 41. Schadowance w chóśebuskem Gladhouse docełego prědny raz wustupiła pśed publikumom. A něnto su měli pó wuspěšnej premjerje južo tyźeń pózdźej swój drugi wustup. „To jo za nas wjelika cesć“, jo groniła Yvonne, ako běšo ako młode źowćo sobu spiwała w Dolnoserbskem źiśecem chorje.