Z Pódstupima/Potsdam. Slědny raz we tom lěśe jo se zmakała bramborska Rada za serbske nastupnosći w krajnem sejmje Pódstupimje. Jo to było wósyme wobradowanje lětosa. Na zachopjeńku jo směła delegacija powědaŕkow a powědarjow dolnonimšćiny rozpšawiś – ga wó tom, kak jo se jim zejšło pó jadnom lěśe z Dolnonimskeju kaznju (Niederdeutsch-Gesetz). Christamaria Ruch, jadnaŕka Towaristwa Dolnonimšćina w kraju Bramborska, jo na to pokazała, až mjaztym dajo prědne nimsko-dolnonimske dwójorěcne tofle w Bramborskej, na pśikład we Flemingu a we Wittstocku. Wšak by se wóna žycyła, až by to dolnonimske teke zaśěgnuło do Bramborskego parlamenta. Mimo togo brachujo dolnonimskej rěcy medijowa prezenca w casnikach – tak namakajo pisna rěc lěbda rum. Comuž to towaristwo pak wjelgin źěkowne jo, to jo lěta dłujke dobre zgromadne źěło ze Serbami a pódpěra Serbow. Jörg Gehrmann, pśedsedaŕ Towaristwa Dolnonimšćina w kraju Bramborska, jo naraźił, až by mógał Měto Nowak ako pśigranjański partnaŕ za Dolnonimskich w Serbskej raźe fungěrowaś.