W lěśojskem semestrje 2025 stej prědnej studentce Masterowego studija serbšćina Katarzyna Wilke a Marita Schumann swój studij z wjelgin dobrym rezultatom wótzamknułej. Wónej stej byłej tej prědnej, ako stej se zwaźiłej na toś tu drogu, dwě drugej studentce hyšći studěrujotej jadno lěto na bachelor. Puś njejo był pśecej rowny a wšake wěcy su se dejali akle wujadnaś, ale uniwersita w Lipsku jo to derje zwónoźeła. Zachopiłej stej wobej w lěśe 2021 z rěcnym pśedkursom, ako jo organizěrował Šulski amt Chóśebuz. Toś ten propedeutikum ako teke ceły studij jo se wótměł pódla pówołanja ako ceptaŕka. W nazymje 2022 jo se pótom studij w Lipsku zachopił, ten jo tak rědowany był, až stej se module rěcna teorija a didaktika wuwucowałej w Lipsku na Instituśe za sorabistiku a module rěcna praksa, stawizny, literatura a kulturne wědomnosći we formje ekskursijow w Chóśebuzu. Docenty su wariěrowali, ale we głownem stej to byłej Till Wojto a dr. Madlena Norberg.