Šulski chor Dolnoserbskego gymnaziuma jo se wót łońskego spóźiwabnje wuwił. Tuchylu ma 45 sobu-statkujucych młodych luźi, a Geraldoju Šejnoju (muzikaliski wjednik chora) a ceptaŕce Jennifer Dünnbierowa (pedagogiska wjednica chora) gótujo to wjelike wjasele, z nimi źěłaś. Wustupy we wjelikej licbje su měli łoni, a we aktualnem šulskem lěśe su južo 12. oktobra z nazymskim koncertom w Pšynem publikum zgórili a pśed krotkim pśi mytowańskem zarědowanju nazymskeje olympiady. To pśiduce, na což móžomy se wjaseliś, buźo wustup chora DSG pśi lětosnej Schadowance sobotu, 15. nowembra. Pótom tek pśi tyma dwěma gódownickoma w gymnaziumje, ako buźotej 9. a 10. decembra. Jo to pśecej samski program, ale na dwěma terminoma musy to byś, dokulaž kapacity zala w šuli njedosegaju, aby wšykne starjejše a gósći nutś mógali. Póstajenja dla šćita pśed wognjom tek njeby dowólili, až zal se tak natyknjo. Zastup buźo teke lětosa zasej dermotne, ale změju tiketowy system, aby se woglědarje derje rozdźělili na dwěma dnjoma.