6. stacija: Wjerbno/Werben

Z Gór jo ta Błośańska zeleznica dalej jězdźiła do Wjerbna – nejpjerwjej na kšomje šoseje do Bórkow a pón pśez Wjerbno. Blisko něntejšneje šule, źiśownje a „kněskego dwóra“ a pón pśez drogu do Smogorjowa. Wjerbańske dwórnišćo běchu na kóńcu jsy załožyli a 21. maja lěta 1899 su how wuwitali prědny śěg. W samskem casu jo droga tamkor dostała mě „Dwórnišćowa droga“. Běchu how twarili wětšy dom za zeleznicarja, kenž jo how wugbał swóju słužbu, a z rumnosću za luźi, ako su cakali na śěg. „Abtryt“ su teke měli, pak w pśidatnem domcyku. Mimo normalnych kólejow za zeleznicu běchu how dalšne kóleje składli, aby mógali how to a druge nalodowaś na wóze zeleznice.