Ze Žylowa/Sielow. Lěśe jo mimo, dny bywaju krotše a wence jo to cesto njespódobne. To jo cas, sebje zasej wześ to rucne źěło, ako jo pśez lěśe wótpócywało. Pódobnu mysl jo měła Sandra Kosakowa (Kossack) ze Žylowa. Ze swójim cłowjekom Stephan wóna nawjedujo familijowe pśedewześe „Pension Nordstern“. Stwórtk, 16. oktobra, jo se tam prědny pśězowy wjacor wótměł. Styri dalšne wjacory raz wob mjasec slěduju. Póbitowanje w oktobrje jo wužywało 13 žeńskich ze Žylowa a wokoliny. W spódobnej atmosferje su se pśedstajili te žeńske ze swójimi sobu pśinjasonymi rucnymi źěłami. W běgu wjacora pśěze su se wó tom a drugem wuměnili. Na pśikład jo se wótegroniło pšašanje, kak se źejo pěta pśi štrumpach. Tema jo tek była, kak su pśišli ku tym wšakim rucnym źěłam, co wóni z teju źěłabnosću zwězuju a wót kogo su to nawuknuli. Tak jo młoga se domysliła na swójo źiśetstwo. Ale tek aktuelne temy su se pśepowědali, mjazy drugim 725-lětny jubilej Žylowa, kenž jo se w septembrje swěśił. W pśeśěgu jo se tek pensija Nordstern prezentěrowała. Pśipódla su se skibki k zmógnjenju póbitowali, ze sam wupjaconym klěbom.