Z Dešna/Dissen. Chtož jo raz pśi dešańskem kokośe był/a abo na drugich swěźenjach w Dešnje, znajo južo dobry mazańc Domowinskeje kupki z wejsnego pjaca „Bałcaric pjac“. Tenraz, sobotu, 25. oktobra, jo se kupka pak zmakała na dwórje rěcnego gnězda Zorja, aby wuknuła, kak pjaku klěb z kwasom (Sauerteig). Wjadła jo workshop Marina Clarke. Ako nowacka w kuchni jo wóna 2016 swój prědny kwas kubłała. Lěpša pśenjasliwosć kwasowego klěba jo głowna pśicyna za to była. Pśeto pśez fermentaciju, kótaraž nastanjo pśi wužywanju kwasa, daju se zežywidła lěpjej póžywaś. Pśez lěta jo wóna swóje znajobnosći rozšyriła a swójske recepty wuwiła, kótarež dajo źinsa teke we workshopach dalej. Dešanaŕkam a Dešanarjam jo wóna pśedewšym chemiju slězy kwasa rozkładła. Tipy, ako až kwas dej se jano z drjewjaneju łžycu měšaś, jo wóna wótgótowała ako mytose a jo wuzwignuła: Zakład za to a wjelgin wažne za dobry klěb jo pak, až kwasoju se derje źo. To groni, až jo naseśony. Aby se to dojśpiło, musy se kwas futrowaś z muku a śopłeju wódu. Za rytmus futrowanja a chowaŕnju kwasa dajo ale wšake móžnosći.