Z Dolneje Łužyce/Niederlausitz. We awgusće su zwězkozelene z Chóśebuza a wokrejsa Sprjewja-Nysa zjawnje kritizěrowali, až energijowy koncern LEAG južo mjasece dłujko njejo nowe daty nastupajucy wódny staw w chóśebuskem Pódzajtšnem jazorje wózjawił. Slědna informacija na tofli pśi pśilewańskem załožku (Einlaufbauwerk) pśi Łakomej jo była wót maja 2025. LEAG jo reagěrował na tu kritiku – wót zachopjeńka oktobra su se w informaciskem kašćiku zasej wózjawili aktualne gódnoty k wódnemu stawoju. LEAG jo tencas rozkładł, až njejsu wózjawili nowe informacije jano dla togo, až chóśebuski Pódzajtšny jazor jo južo w decembrje 2024 swój cilowy wódny staw dojśpił a až te gódnoty se stakim „wěcej njezměniju kontinuěrujucy“. Mimo togo jo pśedewześe wuzwignuło, až njejo zawězane k wózjawjenju datow a až jo je jano k dispoziciji stajił, dalokož jo to było organizatoriski móžno.